و لا أحى و لا أجمل و لا أروع .......... ليفان 620 الجديده

[طارق فاروق]

السلام عليكم و رحمة الله و بركاته :

كتر الكلام عن ماركة ليفان و توكيلها و حسيت إنه لازم أقول رأيى بكل أمانه كواحد جرب أحد الموديلات و اتعامل مع التوكيل و ده مكانش ينفع إلا بعد ما أعمل صيانة الـ 1000 كم و أختبر بعدها قدرة الموتور و التسارع و التعامل مع التوكيل فى أول صيانه و إختبار قدرته على تنفيذ ملاحظاتى على السياره . المهم علشان مطولش عليكوا العربيه واسعه و مريحه جدا من الداخل مع الفرش الجلد و التابلوه بخاماته الرائعه مع الأحساس بالأمان لوجود 2 أير باج و الشنطه واسعه جدا (650 لتر) ده من الداخل نيجى بقى للحركه العربيه ثابته جدا على طريقة أحمد عز فى إعلان الكروز و العفشه قويه و ناعمه و لا يوجد بها أى أصوات فى المطبات كأن الشوارع إتسفلتت من جديد و الموتور قوى و سحب العربيه رائع و أكتر شىء عجبنى فيها و كان ملفت جدا للنظر هو الفرامل بجد تحفه و قويه جدا و على الرغم من أن العربيه تقيله و الموتور قوى إلا إن الفرامل بتقدر توقفها فى مسافه قصيره جدا و بدون دوران لجسم العربيه من الخلف و تشغيل التكييف لا يؤثر على سحب العربيه إلا إنى ساعات بحس إنه ضعيف شويه فى الأيام الحاره بس ده يمكن لأن الصالون واسع أو يكون عايز يتزود فريون . و بعد الـ 1000 كم وجدت بعض الملاحظات مثل وجود صفاره فى الفرامل و عضه فى الفتيس مع الغيار الأول و صوت الموتور عالى و قطاش البطاريه مكنش مربوط كويس و الدبرياج واطى و الحاجات دى متوقعه لأن زيت الموتور و الفتيس بيبقى تجريبى لأول 1000 كم و التيل جديد . على العموم قلتلهم الملاحظات دى فى الصيانه و تم تنظيف التيل و تغيير زيت الموتور و الفلتر و زيت الفتيس و رجلشة الدبرياج و ربط قطاش البطاريه و الحمد لله كل الملاحظات إتعملت بس صوت الموتور لسه عالى شويه و أنا مستنى على الـ 5000 كم يكون الموتور طبع أكتر و يكون صوته بالطبع أهدى و على العموم الصيانه خدت ساعتين و دفعت 235 جنيه تمن الزيوت فقط . دى بكل أمانه تجربتى مع العربيه و التوكيل و باقى مميزات و صور العربيه موجوده فى موضوعات أخرى فى المنتدى الصينى و أنا فعلا حاسس إن ربنا وفقنى فى إختيار العربيه المناسبه لى و لأسرتى بعد سلسله من التجارب مع ماركات كتيره كان ليها مميزاتها و عيوبها و برضه أرجع و أقول لا تزم و لا تشكر قبل ............... حددوا إنتوا بقى المده .

[حازم شاهين]

أشكرك على نقل تجربتك و منتظرين إنطباعات و أراء أكتر عن العربية
م زيادة إستخدامك ليها

[طارق فاروق]

إن شاء الله يا أستاذ حازم و أى أستفسار أو أيضاح فى حدود تجربتى أنا مستعد للأجابه عليها و بكل أمانه .

يا ريت يا برنجي تحطلها صور وتقولنا ايه مميزاتها وتقبل تحياتي

[طارق فاروق]

المشاركة الأصلية كتبت بواسطة corsair

يا ريت يا برنجي تحطلها صور وتقولنا ايه مميزاتها وتقبل تحياتي

تحياتى ليك و مميزاتها هى :

1- المظهر الخارجى إنسيابى و شبيه بالكورولا 2007
2- الصاج قوى 0.8 مم .
3- توجد مسافه غير قليله بين الشبكه الأماميه و الرادياتير و مسافه مشابهه أخرى بين الرادياتير و الموتور بالأضافه لوجود قضيبين صلب خلف الشبكه
4- الشنطه واسعه جدا 650 لتر
5- الصالون واسع و مريح و خامات الفرش الجلد و التابلوه رائعه .
6- التقفيل العام جيد
7- عزل المقصوره جيد
8- طقم الصيانه من الصين
9- قطع الغيار متوفره و أسعارها معقوله فمثلا تيل الفرامل 80 جنيه الزجاج الأمامى 350 جنيه
ده بالأضافه لباقى الكماليات مثل التكييف و الباور و مرايات الكهرباء بالأشارات و 4 زجاج كهرباء بوحدات رفع و سنتر بالريموت فى المفتاح و إنذار و جنوط سبور و فرش جلد و كمبيوتر رحلات و RPM و عداد الحراره و البنزين diagram و كاسيت CD_MP3_WMA_RADIO AM-FM و 2 أير باج و حساس بارك و حساس نور و أحزمة أمان بالمقاعد الخلفيه و طبعاً الأماميه و المقاعد الخلفيه قابله للأنطواء.

و دى بعض الصور للعربيه من على النت و لا يوجد فيها أى إختلاف عن العربيه اللى معايا لعيونك ياباشا .

[طارق فاروق]

بعد صيانة الـ 5000 :-

عملت صيانة الـ 5000 كم و كنت بشتكى من علو صوت الموتور و صفارة الفرامل و ضعف التكييف و فى الصيانه تم تغيير التيل الأمامى و تنظيف السربنتينه و تربيط العفشه و النتيجه إن صفارة الفرامل ضعفت خالص و بتتسمع بصعوبه بس لسه موجوده و أنا شايف إن فراملها قويه بس فى المقابل ممكن تكون بتاكل التيل بسرعه بس مش هاقدر أحكم دلوقتى و التكييف إتحسن كتير عن الأول بس فى المجمل يعتبر أضعف من تكييف اللانوس اللى كانت معايا قبلها و صوت الموتور وطى و برضه بقى يتسمع بصعوبه بس مش كبيره و دفعت فى الصيانه 104 جنيه و أستغرقت ساعتين أما عن سواقتها عموما فأنا جبت بيها 160 كم على طريق مصر- الإسكندريه الصحراوى و مجربتش أزود عن كده علشان كان معايا الولاد و العربيه كانت ثابته و مفيش أى غربله فى الدركسيون و إن شاء الله هاكتب تقرير بعد الـ 10000 لمزيد من الإفاده .

[souuu]

شكرا على تقريرك وانا لدى نفس النوع بس عملت بيها 3000 كم حتى الان ولدى نفس شكواك وتم تغيير تيل الفرامل لاكن الصفارة مستمرة عند استخدام الفرامل فقط اما التكييف اعتقد سبب عدم الاحساس به هو وجود تسريب لهواء الموتور بمعنى عدم عزله جيدا عن صالون العربيه لاكن فى التوكيل تم الكشف عليه وتزويد الغاز وعند تشغيله تشعر بالهواء البارد عند تقريب يدك منه ولا تشعر بتأثيره داخل السياره واعتقد ايضا ان السبب فى ذلك انه يفصل كثير ولا يستمر فى العمل حتى يبرد الصالون والله اعلم ... كمان كان عندى مشكله فى غيار الفتيس والحمد لله تم معالجته لاكن عندى مشكله بسيطه ظهرت الان وهى تخبيط علبة الدريكسيون فى المطبات ... فى النهايه انا معك ان السيارة قويه وثابته بس الحلو ما يكملش فلو لم تظهر تلك العيوب لاصبح تقييم السيارة ممتاز وعموما اعتقد انها افضل سيارة صينى حتى الان.

[بدر بسيونى]

شكرا للاستاذ طارق والاخت سو على ارائكم وانطباعتكم ومستنين المزيد

[Devill Blood]

والله ياخونا أنا بقول أن اللى بيحكم على ماركة أو صناعة معينة فى سنة ولا 2 ولا تلاتة ولا حتى 7 حرام عليه ,أنا شايف المركة فعلا نقدر نقول عليها حلوة ولا وحشة بعد 10 سنين كأقل شئ مش نجيب العربية ومشينا بيها شوية بلقى خلاص ,
بالنسبة للعربية نفسها فالعربية فعلا بتبدأ تتبهدل من 3 سنين وأنت طالع أقل من كده يبقى حرام فيها الفلوس

[طارق فاروق]

المشاركة الأصلية كتبت بواسطة Devill Blood

والله ياخونا أنا بقول أن اللى بيحكم على ماركة أو صناعة معينة فى سنة ولا 2 ولا تلاتة ولا حتى 7 حرام عليه ,أنا شايف المركة فعلا نقدر نقول عليها حلوة ولا وحشة بعد 10 سنين كأقل شئ مش نجيب العربية ومشينا بيها شوية بلقى خلاص ,
بالنسبة للعربية نفسها فالعربية فعلا بتبدأ تتبهدل من 3 سنين وأنت طالع أقل من كده يبقى حرام فيها الفلوس

و الله ياباشا ده مش حكم على العربيه اللى أنا بكتبه متابعه لحالة العربيه مع الأستخدام و الحكم بيكون للأشياء الظاهره زى الثبات و الأتزان و قوة و صوت الموتور و الفرامل و حالة العفشه و مدى وسع العربيه و راحة المقاعد و الصالون و مستوى الخامات و التقفيل و الحاجات دى مش عايزه سنين علشان تحكم عليها فيكفى أن تجلس خلف الدركسيون و تدور الموتور و تمشى بالعربيه بالنهار و الليل و تستخدم التكييف علشان تقدر تحكم على الحاجات دى أما باقى الحاجات اللى مبتظهرش غير بعد 10 سنين زى مابتقول هى مدى تماسك العربيه بوجه عام و درجة صمود الموتور (بعد كام سنه هيفوت) إمتى الديسك و الأسطوانه هيتغيروا و الحاجات دى بتحصل لكل العربيات بتتفاوت فى المده فأنا مش هاقدر أستنى لما أحكم على موديل 2010 علشان أركبه 2020 و ياما ماركات و موديلات أخرى أمريكيه و يابانيه و أوروبيه نزلت بيها عيوب و تم سحبها أو تصليح العيب فى مركز الصيانه على حساب الوكيل زى طلمبة الميه فى اللانوس و برمجة الفتيس الأوتوماتيك فى الميجان 2 و دواسة البنزين فى التويوتا و غيرها كتير فالواحد بيعاين الحاجات اللى شايفها و بيسأل على إمكانيات العربيه و مواصفاتها و بيجرب سواقتها و لو إرتاح لها بيشتريها و هو و حظه و ده فى كل الماركات مش فى الصينى بس و شكرا لمداخلتك .